Uşaq mebeli seçməyin qaydaları
Uşaq mebeli seçən zaman təkcə görünüşə və funksionallığa deyil, təhlükəsizliyə də diqqət etməlisiniz.
Nəzərə alın ki, uşaqlar çox aktiv və ya hiperaktiv olurlar. Bu məqamı diqqətə alaraq, çalışın otaqda həddindən artıq böyük mebel olmasın. Doğru planlaşdırılmış otaqda uşağın əlavə bacarıqlarını kəşf etməyə dəstək olacaq elementlər (qlobus, şahmat, rəsm lövhəsi, basketbol səbəti) yerləşdirin. Unutmayın ki, uşağınızın öyrənmək, əylənmək üçün şəraiti olmalıdır.
Uşaq mebeli seçərkən onun materiallarına xüsusi diqqət yetirin. Çalışın, alacağınız mebel ekoloji cəhətdən təmiz materiallardan hazırlanmış olsun. Bəzi istehsalçılar DSP materialından keyfiyyətli mebellər təklif edirlər. Lakin bu materialdan hazırlanan mebel aldıqda, istehsalçıdan sertifikat tələb etməyi unutmayın.
Uşağın rahatlığı üçün mebelin rəngi də mühüm rol oynayır. Parlaq, əlvan rəngli mebel uşağın əhvalına müsbət təsir edir. Əlvan rənglərin çoxluğu yaşlı adamlara mənfi təsir göstərsə də, uşağı heç vaxt belə rənglər qıcıqlandırmır. Yaşlılar qara rəngli mebeli daha uyğun hesab etsələr də, uşaqların rənglərə münasibəti fərqlidir. Onlar parlaqlığı, əlvan rəngləri, müxtəlif nağıllardan mənzərələri, şəkilləri sevirlər. Bu baxımdan da müxtəlif şəkilli mebellər uşağın xoşuna gəlir. Misal üçün, oğlan uşağı üçün dənizi xatırladan mebel dəstlərindən istifadə etmək olar. Uşaqlar çox vaxt yatmaq istəmirlər, çarpayının gəmi, maşın kimi maraqlı dizaynda olması onları maraqlandırar. Qızlar üçün isə çəhrayı mebel, şahzadə, müxtəlif gəlincik rəsmli mebel daha münasibdir.
Böyük otaqlar uşaq otağı üçün uyğun deyil. Böyük otaqda, böyük mebel və əşyaların arasında uşaq özünü narahat hiss edir və stullardan, müxtəlif parça və lövhələrdən özü üçün balaca oyuncaq ev qurmağa başlayır.
Uşaqların şəkil çəkmək və ya dərslərini hazırlaması üçün yazı stolu da önəmlidir. Yazı stolu düzgün yerləşdirilməlidir ki, pəncərədən üzərinə işıq düşsün. Əgər müəyyən səbəblər üzündən yazı stolunu pəncərənin qarşısında yerləşdirmək mümkün olmayıbsa və stol otağın qaranlıq küncünə qoyulubsa, divara maraqlı şəkillər asmaq olar. Uşaq dərslərini hazırlayarkən stolun üstünə əlavə lampalar da qoymaq olar. Yazı stolu çox kiçik olmamalıdır. Burada uşağın dəftər-kitabı, qələm, boya və başqa lazımlı əşyaları yerləşməlidir.
